Esperanto en Sankt-Peterburgo

La 23-an de novembro en la sidejo de la peterburga E-kolektivo “Kariljono” okazis renkonto kun Aleksandr Korĵenkov, la Esperantisto de la Jaro 2009 kaj ĵusa laŭreato de la prestiĝa Esperanto-kulturpremio de la urbo Aalen. Por plene prezenti nian gaston oni bezonus plurajn paĝojn, do mi nur donas la plej gravajn informojn pri li.

Oni plej konas lin kiel la redaktoron de la internacia sendependa magazino “La Ondo de Esperanto”, kiun li redaktas dum 20 jaroj. Ĉar ĉiuj interesatoj bone konas “La Ondo”-n, mi ne plu skribos pri ĝi, sed prezentos lian eldonan agadon. Aleksandr Korĵenkov estas eldonisto. Kune kun sia edzino, Halina Gorecka, li eldonis jam 114 librojn, interalie, kadre de kelkaj gravaj eldonprojektoj.

La plej konata projekto estas la serio «Mondliteraturo» en kiu estas prezentataj la ĉefverkoj tradukitaj el diversaj lingvoj, ekzemple, la tuta “La Mastro de l’ Ringoj” de Tolkien kaj ties “La hobito”, kvin romanoj de Simenon pri komisaro Maigret, kaj du libretoj de Lewis Carroll pri Alico. Kun ĝuo renkontis la legantoj la duan eldonon de la mondfama krimromano de Conan Doyle “La ĉashundo de la Baskerviloj” en traduko de William Auld.

En la serio «Rusa literaturo» aperas Esperanto-tradukoj de eminentaj rusaj verkistoj: Ivan Turgenev “La unua amo”, Anton Ĉeĥov «Ĉeriza ĝardeno», Fjodor Dostojevskij «Blankaj noktoj», Lev Tolstoj «Resurekto» ĝis la krono de ĉi tiu kolekto “Rusa novelaro. Volumo I”.

La eldonejo “Sezonoj”, kiun Gorecka kaj Korĵenkov prizorgas, grave kontribuis al la internacia libroserio «Oriento-Okcidento» en kiu la aŭtoroj strebas malfermi animojn de popoloj en la Oriento kaj en la Okcidento. En ĝi estas eldonitaj jenaj libroj de Sezonoj: “La majstro kaj Margarita” (M.Bulgakov), “Krimo kaj puno” (F.Dostojevskij), “Eŭgeno Onegin” (A.Puŝkin), “Malvivaj animoj” (N.Gogol).

Promesplena estas la projekto «Sed ne el la katedro» kies la 5-an volumon la legantoj renkontis kun ĝojo.

Sed lia plej interesa iniciato estas la serio «Scio» kiu enhavas gravajn kaj seriozajn verkojn pri Esperanto kaj interlingvistiko. En julio de la 2010-a jaro aperis jam la 9-a volumo de «Scio»: “Zamenhof. Biografia skizo”, kiun Korĵenkov mem verkis. (En Nov-Jorko jam aperis angla traduko de ĉi tiu libro.)

Pri Ludoviko Zamenhofo oni scias el multaj verkoj verkitaj de diversaj aŭtoroj. Sed pro la jaroj la biografio de la Majstro ensorbis multajn elpensaĵojn kaj konserviĝis kiel la mita. Korĵenkov per siaj esploroj en arkivoj kaj bibliotekoj forlavis polvon kaj eĉ la ŝlimon de la persono kiu estas Zamenhofo. Li laboris, interalie, en:

• Nacia historia arkivo de Belorusio en Grodno,
• Kauna regiona arkivo (Litovio),
• Ruslanda ŝtata biblioteko en Moskvo,
• Centra historia arkivo de Moskvo,
• Ruslanda nacia biblioteko en Sankt-Peterburgo,
• Ruslanda ŝtata historia arkivo en Sankt-Peterburgo.

Surprize por la peterburgaj esperantistoj, kiuj venis dudekpersone, Aleksandr rakontis pri la patro de la Majstro — Marko Zamenhofo — kun pluraj tute novaj kaj eĉ surprizaj informoj.

Post la interesa prelego estis teumado kaj libera babilado. Oni demandis la gaston pri lia eldonado, pri “La Ondo”, pri lia esplorado, pri “Radio Esperanto” kiun li gvidas kun sia edzino. Dum la kafopaŭzo Aleksandr vendis kvardekon da lernolibroj kaj plurajn aliajn librojn. Peterburgaj esperantistoj alte taksas la viziton de la Esperantisto de la Jaro. Fine de la vespero Aleksandr modeste nomis nian klubon: “verŝajne unu el la plej interesaj en Ruslando”. Ni atendos Aleksandron en la sekva jaro.

Laŭ komisio de la peterburga esperantistaro kompilis
A.Sidorov (Sankt-Peterburgo).